Бейсенбі, 10 Желтоқсан 2015 14:37

Тәуелсіздік – тәлейім

Еуразия материгінің кіндігінен орын алған, керегесі кең, шаңырағы биік қазақ елін жырламаған жыршы, жазбаған жазушы, әніне қосып әуелетпеген әнші қалмағаны сөзсіз. Ғасырлар қойнауында жатқан тарихы мен мәдениеті, тұрмыс-салт ерекшеліктері ешкімді де бей-жай қалдырған емес. Көз жауыңды алатын көркем табиғаты, асқар тау, кең дала, момын халқы бәрі-бәрі тамсандырып, таңырқатып еріксіз бақыт құшағына еліте береді.

 

Осындай қасиетті елде туып, жерін басып, шұрайлы тілін үйреніп, киелі халықтың бір буын ұрпағы болып дүниеге келіп, жарық дүниенің шапағатына бөленгенім үшін Аллаға ризашылығымды айтамын, ата-анама мәңгілік қарыздармын. Осы құндылықтарды құрметтеуге әрі мақтануға шақырамын.

Өз басым тарих және қазақ әдебиеті пәнін қызығып оқимын. Онда елімді жұдырықтай жұмылдырған хандарға, қара қылды қақ жарған билерге, айбатынан жау шегінген батырларға, елінің қамын бір кісідей ойлаған біртуар азаматтарға қарап сүйсінемін.

Халқымның өткенін екшей келе, кемел келешегім турасында да ойланатыным бар. Елбасы Н.Ә.Назарбаевтың салиқалы саясатының арқасында көп ұлтты мемлекет атандық. Көк туымызды биік ұстап, дамыған озық отыз мемлекеттің қатарына аяқ бастық. Алла ниетіне берген. Мен де елімнің өркендеп өсуіне өз үлесімді қосқым келеді. Еліме амандық, жеріме тыныштық тілей отырып осынау құндылықты құлатып алмайық деген ізгі тілекпен өз өлеңімді ұсындым.

Батырлары бар бүгін қазағымның,

Біріне де мойымас азабыңның.

Қолына қару алып аласұрар,

Аруы да азулы Алашымның.

Мен қазақпын, туылдым осы өлкеде,

Самайымнан сипайды ескен жел де.

Тамылжып табиғаты дем береді,

Табанымнан тірейді бөстек жер де.

 

Айым Тоқтасын, Масақ орта

мектебінің оқушысы.

Қаралды 801 рет
Copyright © 2014 Меншік иесі: ТОО "Еңбекшіқазақ" Есік қаласы, Алматы обласы № 4270-Г

Жарнама