Бейсенбі, 03 Наурыз 2016 12:37

Ислам дініндегі әйелдің орны

Ислам діні адамзатқа келмес бұрын, адамдар әйел затын бүгінгідей сыйламақ түгілі, ар-намысын таптап, кемсіткен екен. Ал, Ислам діні келісімен әйелдің қоғамдағы орны белгіленіп, ар-намысы қорғалып, еңсесі көтерілген. Яғни, Алла Тағала әйел затын қорламауды айтып, қорғайтындығын ескерткен. Алладан кім қорықпайды? Бәрі де Раббымыздың алдында бас иеді, әрбір жүрек Жаратушының барын сезіп, сескенетіндігі ақиқат. Өйткені, әрбір іс-әрекет үшін ақыретте сұралатындығымыз белгілі.

 

Омар (р.а) «Біз әйел баласының да жеке құқықтары болатынын Ислам келуімен біле бастадық», деген. Ислам дінінің көзқарасында әйел заты – аяулы ана, сүйікті жар, сүйкімді қыз, жанашыр әпке. Сондай-ақ, хадистерде: «Жәннат ананың табанының астында», «Сендердің ең жақсыларың, әйелдеріңе ең жақсы қарым-қатынаста болғандарың», деп айтқан. Бұл сөздермен Ислам діні еркектерді әйел затын сыйлауға тәрбиелейді. Пайғамбарымыз Мұхаммед (с.ғ.с) осы хадистерінен кейін ешбір бала анасына, ершбір еркек әйелге жақсылықтан өзгені жасамаса керек.

Ислам тарихындағы Пайғамбарымыздан (с.ғ.с) кейін алғаш Исламды қабылдап, дін жолында бар байлығын сарп ете білген әйел кісі Хадиша анамыз (р.а) болды. Сол себепті, Алланың елшісі (Оған Алланың игілігі мен сәлемі болсын): «Ел менен теріс айналған кезде Хадиша маған сенді. Айтқандарымды ешкім қабылдамағанда, менің сөзімді алғашқы болып растаған сол еді» – деп, оны өмір бойы ұмытпай, жасаған жақсылықтарын үнемі еске алумен болды. Хадиша анамыз (р.а) тірі кезінде жәннаттағы үйімен сүйіншіленген әйел кісі еді. Бірде Жебірейіл періште (а.с) Пайғамбарымызға (оған Алланың сәлемі мен игілігі болсын) келіп: «Раббым Хадишаға сәлем айтты. Менен де сәлем айта бар. Оған жәннатта шаршамайтын, шалдықпайтын үй тұрғызылады», дейді. Бұл қуанышты Алла елшісі (оған Алланың сәлемі мен игілігі болсын) Хадиша анамызға (р.а) келіп: «Уа Хадиша! Саған Алла мен Жебірейіл сәлем айтты, деп хабар жеткізгенде Хадиша анамыз р.а Алланың Өзі Сәлем, ал, Жебірейілге сәлем болсын» – деп, көрегенділік танытады.

Сонымен қатар, Исламда ең алғаш Алла жолында құрбан (шаһид) болған да әйел кісі Сумәийә болған. Сондай-ақ, Айша (р.а) секілді Алла елшісінен (оған Алланың сәлемі мен игілігі болсын) біздерге көптеген хадистерді жеткізген аналарымыз болатын.

Бір күні Алла елшісі (оған Алланың сәлемі мен игілігі болсын) Қағбада намаз оқып тұрған кезінде мүшріктердің бірі келіп, үстіне түйенің ішек-қарнын тас-тап жібереді. Сонда, мұны көрген Фатима (р.а) анамыз әлгілерді ұрсып, әкесінің үстін сүртіп, демеу көрсетеді.

Ислам діні жолындағы осындай аналарымыздың табанды ерліктері мен қажырлы еңбектерін бағалап, Пайғамбарымыз (оған Алланың сәлемі мен игілігі болсын):  «Осы дүниеде және ақыретте құрметке бөленетін төрт әйел бар: Имранның қызы Мәриям, перғауынның жары Әсия, Хуалидтің қызы Хадиша, Мұхаммедтің қызы Фатима», деген.

Ислам тарихшыларының сөзіне сүйенсек, әйелдер дін үшін соғыстарда да ерен еліктер көрсеткен. Қолдарына қару алып, соғысумен қатар, керек кезінде түрлі қызметтер де атқарған. осыған орай қазақ халқында «Әйел бір қолымен бесікті тербетсе, бір қолымен әлемді тербетеді» деген ұлағатты сөз де бар. Қорыта келгенде, Ислам дінінде әйелдің орны ерекше. Ислам діні әйелге Алланың аманаты ретінде қарауды бұйырған. Сондықтан, әйелге деген құрмет зор болуы тиіс.

Сапархан АЙДАРХАНҰЛЫ

Ауданның бас имамы.

Қаралды 922 рет
Copyright © 2014 Меншік иесі: ТОО "Еңбекшіқазақ" Есік қаласы, Алматы обласы № 4270-Г

Жарнама